شوفوا الدنيا لما بتقلب ………………….لما قانون القوه بيغلب
لما الدنيا تصبح غابه ………………. وعلي قوانينها لازم نقلب
لما يخش الراجل التعلب………………حمل وديع لابس وبيلعب
يخش علينا طاووسنا الراجل ………نافش ريشه ألوان تعجب
يدخل لينا شخص جبان ………….. اكيد عرفته الرجل الأرنب
لكن فجاه وبصوت يرعب…………….الرجل الاسد جه للملعب
ناسي كمان الرجل الفار……………يخطف يجري لكن يتعب
وادي الغابه زي الدنيا……………..فار اسد أرنب مع تعلب
والطاووس معجب بجماله…………….قال بحلاوته دايما يغلب
مسك اللقمه الرجل الفار……………جالو قوام الراجل الارنب
قاله انا وانت غلابه يافار…………..هاتها اكلها ونطلع نهرب
خطفها بخفه الرجل التعلب…..وقام يتحامي في حضن المرعب
قالو شامم ريحه خيانه …………….م الطاووس والفأر والارنب
ايه رايك في عشوه الليله………….لحم طاووس بجماله يعجب
هبعتهولك تاكلوا لوحدك …………….. انت ملكنا ولازم تغلب
قال لطاووسنا انفش ريشك …………انت الريس وتعالي نقلب
روح للاسد وقولو قرارنا……………. ولو ناقش اديلو الارنب
راح فيها المعجب بجماله…………..اكله جميله ف بطن المرعب
وقام التعلب اكل الارنب ……………..قال للفأر اهرب تكسب
لما التعلب ينزل يلعب ……………….يحط شروطه جوا الملعب
يبقي الاسد ملك للغابه ………………وبتخطيط تفانين التعلب
والله الدنيا دي زي الغابه……………. وبقوانينها احنا بنلعب
متنافسش ع اول كرسي ………..كرسي الأسد الملك المرعب
واختارلك دور واحد تاني…………فار طاووس ارنب او تعلب
………………………. محمود قطامش …………………
