هذه قصيده لي قام بالرد عليها القدير دكتور جمال عبدالله
ثم كانت المناظره بيننا علي النحو التالي :———–
((((((المصريه ))))))
جت بصتي وعاتبه عليا
………….قلت قصيده لواحده شامية
انا بنت بلادك يابن قطامش
………………..حس ياشاعر بص عليا
زي القرع تمد لبرا
…………… مين في جمال المصراويه
خفه دمي غنوا ليها
……………… اجنن منهم الف وميه
جمالي طبيعي واسأل تعرف
……………مش عملالك ميت عمليه
شوف الطيبه عامله ازاي
…………….. ومتكلمتش علي الحنيه
انا سانداك من يوم ماعرفتك
…………واصحي علشانك م الفجرية
غسل وطبخ وكنس يوماتي
…………….وشايله همومك والتربية
وناسي كمان الشغل ورايا
…………. ميكروباصات وغلاسه عليا
كنت تقولي ياروحي الأول
…………… شوف تليفونك انا داخليه
ومره تقول عليا حكومه
…………………. ومره تقول عليا وليه
فيها ايه تاخنانه شويه
………………ماهو من خيرك بان عليا
همه شويه دايت أعملهم
……… ناعومي وكلوديا ما يملوا عينيه
شوفت بأه بقولها ازاي
………………… أو ايوه الاسكندرانيه
عايز هيك اديلك منها
……………… وكمان شو اعملها اغنيه
آكلي جميل يملالك كرشك
……………..محشي كرنب مع ملوخيه
بابا غنوج هغنجهولك
………………. والفتوش ده سيبه عليا
هي صحيح غنوجه شويه
…………. يااخي دللني وخود ملاغيه
ااقول بصراحه الحق معاها
…………….بنت بلادي دي ميه الميه
طول عمري هتغزل فيها
………….. توبي ولابسو وخيرها عليا
……. محمود قطامش ………….
ناعومي كامبل وكلوديا شيفر اشهر عارضات أزياء بالعالم
………………………….
رد القدير الشاعر دكتور جمال عبدالله
DGamal Abdalla
لو كنت مكانك يا قطامش
كنت هارد واقول انا طافش
من مطبخ اصبح دنياكى
او بصلة زرعوها جواكى
انا مش عايش للملوخية
او محشى وطاسة تقليه
او يوميا تمسحى بيتك
وكانك عامل بلدية
قلت اجيبلك غسالة حلوة
تغسل تنشر اوتوماتيكية
علشان تفضى شوية لجوزك
او تديه حبة حنية
برده المطبخ هو ملاذك
حبك ليه وصل الملاغية
طب علمى حبة لعيالك
احسن بكرة هايرجعوا ليا
لبس وجبته ولا لبستيه
مكياج جبنا …ورميتيه
ورجعتى تقولى الشامية؟
الشامية طباخة شاطرة
لكن جوزها اهم كتير
تملا بفرخة اجدع سفرة
لكن جوزها بجد امير
انا مش عاوز خدامة ليا
او واحدة تدرس تدبير
انا عاوز ملكة لمملكتى
تقابلنى وتنسى التكشير
تسعدنى وتسعد ايامى
وتخلينى عايش كامير
.
تحياتى لروعة ما طرحت اخى محمود قطامش … اسعدنى المرور بمعزوفتك الجميلة
………………………
وهذا ردي علي ماسبق ( رد محمود قطامش ) :-
الست مراه زوجها
عمي جمال يابوعبدالله
……………..خللي بالك بص عليا
الست دي مرايه جوزها
…………..لو مصريه ولا شاميه
لو اكيل تملالك كرشك
……………لو هتحن خود ملاغيه
لو مره طنشت سريرك
…………..مش هتلاقي يوم حنيه
ضارب كرش مدهول نفسك
……….عايزها تغازلك فوق ياعنيه
شايل همك دوم ع راسك
………..ولاوي بوزك في الصبحيه
داخل بيتك كانك شرطي
……….. ومن ازيك عملت قضيه
لازم تهرب تكتس بيتها
…………. وتنسي همومك والتربيه
عمي جمال اخبار الورد
………… عارفه يادكتور جبته هديه
يوم اجازتك نايم طبعا
……… وجاي دلوقتي تقول ملاغيه
قبل ما تعتب اسال نفسك
……… ع اللي عملته دي حتي وليه
قبل الحق فيه دايما واجب
………. وقبل انا عايز خود ياعنيه
مع تحياتي
….. محمود قطامش ….
