دستور يا إخوانا
دستور يا إخوانا دستور …….،،،،.. ومعانا أعداد دستور
راح انده اسمك بالدور ……………لو حاضر تاخد كستور
ولو غايب اسمك مشطوب ………… هنوزع وهنطفي النور
في الأول دوله مدنيه …………….. م الآخر لاهلف وادور
قرأنا فيها ده أساسي …………… اسمحلي بيها يا امور
عايزينها دوله مساواه ……………. متفرق بين نتي ودكور
الكل هياخد ع قفاه ………………. ما تحاول تعمل شطور
ورئيسنا واحد منينا …………….. لا برادعي ولا ايمن نور
حريه مش فعل كلام ……………….لو تعمل تاخد بساطور
واعلامنا مظبوط ع النوته ……….راح يهتف ويقول دستور
وعداله في الظلم تاخدها ………..مش عاجبك اقعد مشكور
والامن هيرجع وسطينا ……..،……….هنبخر ونرش عطور
والصحه وازي الصحه ……………… هنشوفلك فيها دكتور
وهنعمل دوله عصريه …………….. راح تركب كارو وحنتور
لا تقولي نت ولا دياولو……………….مقطوعة لا ميه ولانور
وقولولنا لو ناقص حاجه ………………هنشطب ونلم الدور
وكده متوضب دستورنا ………………وكتبنا مواده بسطور
واوعاك تتكلم او تنقد …………… ما تخللي الطابق مستور
…………………. محمود قطامش ………………….
