خصم .. و حكم

مساجله رقيقه بيني وبين شاعرنا الراقي أ/ محمود قطامش احاول بها أن احاكي السحاب علي قصيدته الرائعه…….خصم وحكم
لو كنت خصم وحكم ……………. يبقي المصير اتحسم
تحكم بلا محبتك ………….. ..ظلم في الارض اترسم
والظلم هشوفه واقع ………….. .. والشكوي للي اتظلم
والشكوي منك اليك ……………. تحكم ما عندك ندم
بالحب ما فيش انصاف………… ميزانه مال و اتخرم
والعدل اجيبه منين …………….. ما دام ف قلبك عدم
ده الظلم طبع الملاح …………….. ولا حب من غير الم
اقرا ف كتب التاريخ ………….. حبيب من حبيبه اترحم
لا روميو خد جولييت ……………. وقيس من عقله اتحرم
ومصيري انا معروف ……………. كتبته تاريخ بالقلم
انت الظالم وانا المظلوم ………….. وهتشهد عليك الامم
……………….. محمود قطامش …………………

لو كنت خصم وحكم….يبقي عليه العوض….انت اللي قلبك ظلم…..و انا اللي ياما انحرم…..الحب عندك غرض….يتباع بأرخص تمن…..لكنه عندي فرض…..قلبي عليه مؤتمن….. قالوها أهل الحِكم….الحب اخطر مرض ….مش هيفيد الندم…..خليك بعيد يا قلبي ….مهو من خاف سلم…..شمس
…………………………………………………………………..
لوكنت خصم وحكم ……. يبقي علينا السلامه
الظلم علينا اتحكم …….. مالناش غير الندامه
ارحم قلبي اللي اتحرم ……… واحكم بدون الملامه
السماح طبع الملاح ………… وادينا بيه العلامه أ/ قطامش
………………………………………………………………………
لو كنت خصم وحكم …..لاعتاب ولا ملامه….وقلبي اللي انظلم…..بكره يمحي ألامه…..صحيح قلبي انهزم…..والجرح ساب علامه…..لكن بعد الندم……هترجع الإبتسامه……شمس
………………………………………………………………………….
لو كان خصم وخلاص ………… كنا سمعنا نداه
الحب يعني الموده …………… والحق دايما معاه
تحكم بغير رحمتك ……………تسمعها مني الاه
الحكم عندك وخصمي ………. العدل فينا تاه
لو سبت قلبك يحاكم ………… الله. عليك الله أ/ قطامش
……………………………………………………………………………
لو كان خصم وخلاص …..ما كان لاموني الناس….. ولا كنت دبت ف هواه …..بقلبه رقه و احساس…..و مِني العقل تاه….من حبه لا مناص …..ايه العمل ويّـاه…..هو كدا الاخلاص……الجرح يبقي جزاه…..من يوم ما شفته يا ناس…..بتمني أنول رضاه
الحب ف الأساااس بسمه علي الشفاه …..شمس
………………………………………………………………….
خلاص انسي الخصام …………وانسي الكلام اياه
وانسي كلام الناس ……………والكل ياخد مناه
مد ايدك. لايدي ……………..سلم ده السلام لله
نعلنها صفحه جديده …………..يشهد ربي بسماه …أ/ قطامش
…………………………………………………………………………….
خلاص ننسي الخصام ….دا الحب ما أحلاه……بيخفف الآلام و ننسي الهموم ويّاه…..ننعم سوي بالغرام …..و القلب يلقي دواه…..تعال يالّا أوام….الله عليك الله
شمس
……………………………………………………………………………………………..
الظلم طبع الملاح …………….. دلوقتي بطلب سماح
طبع الملاح السماح …………….والظلم سابوا وراح
كنت اكيد غلطان …………….. اصفح وداوي الجراح
أ/ قطامش
…………………………………………………………………….
الظلم طبع الملاح……و كان أسوأ سلاح
و مين يداوي الجراح……و من الغرام يرتاح
ما تيجي ننسي اللي راح……بعد الليل الصباح
خلاص يا قلبي سماح…..فجر الامل علينا لاح
شمس لا تغيب
أشكرك أستاذ قطامش علي ردك الراقي العطر
أرق تحياتي