انتخبوني
انا عضو في حزب المحرومين
حزب الناس الغلابه الطيبين
حزب اللي لا يهشوا ولا ينشوا المكسورين
حزب ابويا وعمي وجراني المطحونين
حزب معاكم ع الشمال أو عل اليمين
حزبنا مش حزب إخوان لكن مسلمين
ولا حزب وطني لكن بحب الأرض معجونين
ولا سلفي مع أنهم اصحاب امانه موحدين
حزب ما يحلم بكرسي يحلم بهدمه ورغفين
هدمه يستر بيها نفسه من عينين البصاصين
ولقمه يسد بيها جوعه مع ولاده التعبانين
حزبنا في برامجكم صفحه مليانه انين
شعاراتكم عننا واحنا محناش موجودين
حزبنا شعاره كنبه واحنا بيها ملزوقين
حزب يستني الخلاص بايدين المخلصين
يستني ف مرشح تحت رايته موحدين
يستني السعاده اصله كمان من الموعودين
شعاره لقمته صحته وبرنامجه ولاد متعلمين
احنا حزب الاغلبيه احنا حزب المهمشين
احنا حراس العلم حراس الوطن والدين
……………… محمود قطامش ……………
#محمود_قطامش
