حكايه قصيده
قصيده المصريه
بعد ان كتبت قصيده بعنوان الشاميه والتي كان نصها كالتالي :-
(((( الشامية )))))
هحكي حكايه وقعت انا فيها
…………. كارثه عظيمه اسمعوا ليها
ماشي في حالي طالب ستره
…………….خبطت فيه خبطت انا بيها
قالوا المؤمن دوم متصاب
………….. الا مصيبتي وهحكي عليها
جميل ومدلع شايف نفسه
…………….. واحده منهم دي تكفيها
عيونه جميله ورمشه صايب
……………….. مليون قبلي قتلت بيها
قالت هاي تسمح بسؤال
…………… بلكنه شاميه وده محليها
انت شاعر ليك أشعار
……………..كلها سحر دبت انا فيها
قولي قصيده توصف حسني
………………بكلام مصري أدلع بيها
هيك ياعيوني وفردت طولها
………….. وغنج لغاها وغمز عنيها
شو مابتعرف وين فذلكتك
……….. توصف غيري وتحكي عليها
قولت ملاك شويه عليها
………………. جنه ربي اتخلقت ليها
كل كلامي مايوصف حسنك
………………ولا احبار الكون تكفيها
وادي حكايتي وانا من حزني
……..هقول ف نصيحه اسمعوا ليها
إذا مشيت يوم فيه لوحدك
…………………. غمض عينك أو خبيها
وان صادفت غزال م الشام
………………. قول يارب ماتخبط بيها
وان صابك سهم من العين
……………. ودع اهلك وموت ع أيديها
…………. محمود قطامش ……………
قامت بعض الفضليات علي صفحه الفيس بوك بصب غضبها وعتابها وانهالوا عليا بمالذ وطاب كيف اكتب للشاميه امتدحها ولا اكتب المصريه بنت بلادي فكانت القصيده بعنوان :-
((((((((( المصريه )))))))
جت بصتي وعاتبه عليا
……….. قلت قصيده لواحده شامية
انا بنت بلادك يابن قطامش
…… ………….حس ياشاعر بص عليا
زي القرع تمد لبرا
…………… مين في جمال المصراويه
خفه دمي غنوا ليها
………………. اجنن منهم الف وميه
جمالي طبيعي واسأل تعرف
…………….مش عملالك ميت عمليه
شوف الطيبه عامله ازاي
………………. ومتكلمتش علي الحنيه
انا سانداك من يوم ماعرفتك
………..واصحي علشانك م الفجرية
غسل وطبخ وكنس يوماتي
……………… وشايله همومك والتربية
وناسي كمان الشغل ورايا
…………. ميكروباصات وغلاسه عليا
كنت تقولي ياروحي الأول
……………. شوف تليفونك انا داخليه
ومره تقول عليا حكومه
…………………. ومره تقول عليا وليه
فيها ايه تاخنانه شويه
………………ماهو من خيرك بان عليا
همه شويه دايت أعملهم
……… ناعومي وكلوديا ما يملوا عينيه
شوفت بأه بقولها ازاي
…………………… أو ايوه الاسكندرانيه
عايز هيك اديلك منها
……………… وكمان شو اعملها اغنيه
آكلي جميل يملالك كرشك
…………….. محشي كرنب مع ملوخيه
بابا غنوج هغنجهولك
……………….. والفتوش ده سيبه عليا
هي صحيح غنوجه شويه
. …………. يااخي دللني وخود ملاغيه
ااقول بصراحه الحق معاها
…………….بنت بلادي دي ميه الميه
طول عمري هتغزل فيها
…………… توبي ولابسو وخيرها عليا
……………. محمود قطامش ………….
ناعومي كامبل وكلوديا شيفر اشهر عارضات أزياء بالعالم
