حكايه
عندي حكايه بسر دفين
………………مش عارف ابدأها منين
فيها عبره ودرس ودين
……،……….دي حكايه تاني خمسين
في الاول كنا حلوين
…………….وكمان من الاخر جامدين
اسألو شارع قصر النيل
…………… واسدينه ينطقوا شاهدين
عملنا افلام وبطوله
……………….كان فيها شغل وتفانين
وكافتريا جروبي موجوده
…………… وزينه ولاباس والامريكين
واخر صف في السيما
…………ومترو وميامي لسه قاعدين
وقضينا ايامنا الاولي
…………….نجري ونلعب ولا سائلين
وفي النص التاني علامات
……………..راح تحصل لو انته مين
تسأل ع حبوب الفيتامين
……………وعطاره وشغل الدكاكين
وراح تسال ع الحبه اياها
…………… وهتعرف هتجيبها منين
بقيت في تاني خمسين
………….في النزله راح تنده يامعين
من الم الركبه بنعاني
……….. وعايزين نطلع مش عارفين
بنبحلق و مش شايفين
…………… وان نادونا مش سامعين
والضغط يخبط علي الابواب
…………… والسكر ياسيد الحلويين
كده عادي وخدها بالراحه
………..ده طبيعي ف تاني خمسين
نهايتها مش زي ماتبدا
……………..واسأل ناس زيك تانيين
ونصيحتي سجاده ومصحف
……………..وصلي لله ورد وفرضين
واطلب غفرانه يمكن
…………يكتب لك حسنات التايبين
……… محمود قطامش ………….
جروبي وزينه ولاباس والامريكين
ده اماكن كافتريات في نص البلد
يعرفها جيدا اهل القاهره والجيزه
