بدويه سيناويه
بدويه قاعده في عشتها …….. تحكي للدنيا حكايتها
من يوم ما الام زلطتها ………. وبخرقه قديمه لفتها
لبه بالمش اكلتها ………… وتشيل الميه في جرتها *
في الفجر تاخد غنماتها ……. تسرح وتغني غنوتها *
تغزل بايدها لفرحتها ……… ثوب بيحكي في بلوتها
عل الهامش دايما بتعيش …. ولافرحه ف يوم عرفتها
مهرها قصله وتوب وعباه ….. وبرقع ووقاه لعيشتها *
تعليمها علي ايدين الجده ….تديها من عمرها خبرتها
جوازها وفرحتها خطيفه …….سرقوا في الدنيا فرحتها
تتجوز تذيد متاعبها ………. غنمات مع زوج وخلفتها
تعيد انتاج ماساتها …………والكل مشارك جريمتها
مجتمع ناسي ادواره ……. والدوله غايبه في نومتها
بدويه دي ست الستات ……. الصبر يحكي حكايتها
بمرار وفقر عيشتها ………… الراجل مايشيل شيلتها
والراجل كمان ازمتها ……….. لارحمه والقهر عيشتها
يارب احفظها لاولادها ……….. تكمل بحياتها رسالتها
بدويه بتحكي حكايتها ……..بلاش تسيبوها في وحدتها
ساعدوها بتعليم وصحه ……..وشغلانه لجوزها وخلفتها
وخدوا منها قيمه للناس …….. والعيبه ماعرفت سكتها
ماسكه ارضها وولادها …… حب الوطن والدين عقيدتها
……………… محمود قطامش ………………
* لبه …..خبز يطهي داخل الجمر
*تسرح ….بلغه السناويه تخرج صباحا مبكرا
*قصله …..جزء من ساق نبات الشعير
*عباه …… عباءه تكسو الجسم كاملا
*برقع …….. خمار يوضع علي الوجه محلي بعملات ذهبيه وفضيه
*وقاه……بيت الشعر او الخيمه
